Bhookh

12th Dec 1983
A juvenile idealistic, if pensive perspective of a fifteen year old. Kind of cute...

Sada se hi manushya aur bhookh ke beech

Hai dvand chala aaya

Insaan ne sada bhookh ko maarna chaaha

Kintu bhookh ne hamesha usse haraya

Vastav mein uss ne bhookh ko nahi

Bhookh ne use khaaya

Bhookh ne uss se kya kuchh nahi karvaya

Ek bhookh hi toh thi jiske aage

Insaan ne sada sir jhukaya

Bhookh ne usse chor banaya

Bhookh ne usse lootna sikhaya

Bhookh ne usse zalim banaya

Aur insaan ko insaan ka khoon sarvapratham

Shayad bhookh ne hi chakhaya

Bhookh ne hi insaan mein se naitikta ko nikala

Tatha uss ke bheetar ke shaitaan ko bhookh ne hi seencha aur paala

Bhookh ne manav ko

Sadachari se durachari banaya

Va usse atyachaar karna aur sahna

Sambhavtah bhookh ne hi sikhaya

Bhookh hoti hai to atyachar hote hain

Kuchh log karte hain aur kuchh log sahte hain

Vastutah, atyachar hote rahte hai

Jab tak manushya hai, bhookh bhi rahegi

Aur shayad jab tak bhookh hai atyachar bhi rahenge

Ye kal the, aaj hain aur sambhavtah kal bhi rahenge…