4th Jul 1987
Shaam dhali toh humne socha
Shayad tum aaogi
Mast bol, komal kapol
Naagin zulfen lehraogi
Phir kal na aa paane ka kaaran
Vyathit hoke batlaogi
Vishwas dilakar, prem jatakar
Mand mand muskaogi
Premi man ki is vyakulta par
Man hi man harshaogi
Aur bharkar mujhko aanchal mein
Tum prem amrit varshaogi
Mere aalingan ke bandhan mein
Reh rehkar sakuchaogi
Aur raat dhale ghar jaane ki
Baat soch ghabraogi
Par phir bhi kal aane ka
Vaada karke hi jaogi
Shaam dhali toh humne socha
Shayad tum aaogi
No comments:
Post a Comment