Mulaqat

30th Jul 1987

Sochta hun

Gar tum aa jateen

Toh main kya karta

Paas bahut hotin tum

Phir bhi doori hoti

Shabd

Tasveeron se

Aankhon mein bante bigadte

Par

Ladkhadate hoton ki goonj

Zuban ke peechhe hi

Kisi andhi khai mein doob jati

Tab

Dil mein jazbat koi aisa saaz chhedte

Jiska gunga raag anayas hi

Tumhare dil mein bajne lagta

Aur

Phir shuru hote

Waqt ki ret par

Do jode pairon ke nishan

Ek doosre se

Milte, bichhadte

Kaat-te, simat-te

Aur apni hi kisi sarhad par

Ek doosre mein sama jaate

Kaash, tum ek baar aa jaatin